بســــــم اللـــــــــــــــه الرحمـــــــــن الرحيـــــــم
النهارده يا شباب عايزين نتكلم عن مشكلة او بمعنى اصح كارثه بتحصل دلوقتى فى مجتمعنا الشرقى
وكان من المفروض لاننا مجتمع شرقى ماتحصلش فيه
موضوعنا النهارده عن معاكسات البنات
معاكسة البنات انتشرت جدا دلوقتى بطريقه مخيفه لدرجة ان مابقاش فى امان ان البنت تمشى لوحدها فى الشارع كما حدث فى وسط البلد فى القاهرة
مجموعة فتايات محجبات واقفين فى حالهم اذا بهم مجموعة شباب يعتدوا عليهم وتوصل لتقطيع الهدوم واظن كلنا سمعنا عن الحكاية دى
وغير كده اللى حصل فى محطة الرمل فى الاسكندريه
واللى بيحصل كل يوم فى الشوارع والمعاهد والكليات
وغيره وغيره وغير.............الخ
طيب يا جماعه لو كل واحد يقيسها على نفسه هل انت ترضى بكدة لاختك او خطيبتك او حبيبتك؟
عارفه فى ناس كتير هاتقولى البنت هى السبب فى كده
هاقولهم لا دلوقتى مابقتش تفرق محجبه غير محجبه لبسها واسع او ضيق قصير او طويل
والبنت بتبقى لابسه الاسدال وبتتعاكس ومنقبات وبردو بيتعاكسو
مابقاش يفرق ايا كانت وحشه حتى او حلوة
وكمان الاخطر ان المعاكسة مابقتش بالكلام الحلو مثلا زى :ياجميل ياقمر يا كذا وكذا
لا دى بقت العكس واللى بيحصل ان الشاب من دول يمشى ورا البنت وهاتك يا كلام مش تمام والمفروض انه مايتقالش لبنت
وياسلام بقى لو كان عنده عربيه
اكنه خلاص مافيش حد بيركب عربيات غيره ويجى حضرته بعربيته اللى فاكرها خلاص مافيش زيها ويفرمل قدام البنت فجاة وهى ماشيه وهاتك يا الفاظ قذرة
وبردو وصلت للمس تكون البنت ماشيه فى حالها تلاقى اللى شبك فى ايدها , اللى يضربها, اللى يزوقها وغيره وغيره حاجات كتير جدا بتحصل مايصحش ابدا انها تحصل
لا وخد عندك بقى دعاء قبل ما يبدا المعاكسه
اللهم اجعل فيها من جمال بنات لبنان_وطيبة قلب وحنيه بنات القاهرة_وخفة دم بنات الاسكندريه_ورقة بنات المعادى اللهم ارزقها بأخ في الثانويه العامه مشغول بالدراسه_وأم مشغوله بالمطبخ والجيران_وأب مشغول بالماتشات والبورصه ويارب تكون من اللي بيفطروا باتون ساليه ويتغدوا فيليه_ويارب ميكونش لها صديقات كتير احسن تطلع واحده منهم تعرفنى_
واخيرا اللهم اغفر لى لانى بعاكسها
شوفتوا الايمان
طيب هسألكم سؤال
اية اللى بتستفيدوه من كده ؟
وايه اللى بيفرحكم بكده ؟
هل دى جدعنه ؟ ولا بيخليك واد روش وكل البنات بتحبك ؟
وارجع واسال نفس السؤال
هل ترضى كده لاختك او خطيبتك او حبيبتك؟
وماتنسوش انه اكيد هايحصل لانه كما تدين تدان
وياريت لو كل شاب يتقى الله فى بنات الناس او يعتبرها زى اخته لانه بجد بجد مافيهاش اى استفاده بالعكس دى بتضرك لانها هاتحصل لحد من عائلتك او اللى يهمك
عايزة اسمع ردودكم
واشوف رايكم ايه فى اللى بيحصل ده
منتظرة تفاعلكم .....
بالتوفيق دائما ....
--------------------
الأحد سبتمبر 23, 2007 5:25 pm
